152.
-
râyete meyl ederüz kamet-i dilcû yerine
tuğa dil bağlamışuz kâkül-i hoş-bû yerine.
heves-i tîr ü keman çıkmadı dilden asla
naveg-i gamze-i dil-dûz he ebru yerine.
sürerüz tığımuzun zevk u sefasın her dem
sîm-tenlerle olan lezzet-i pehlû yerine.
gerden-i tevsen-i zîbâda kutâs-ı dilbend
bağladı gönlümüzi zülf ile gîsû yerine.
severiz esb-i hünermend-i sabâ -reftârı
bir peri-şekl-i sanem bir gözü âhu yerine.
gönlümüz şâhid-i zîbâ-yı cihada verdik
dilber i mâh-rûy u yâr-ı perî-rû yerine.
seferin çevri çok ümmid-i vefa ile velî
olduk aşüftesi bir şuh-ı cefa-cu yerine.
olmuşuz cân ile billâh gazâyî teşne
içeriz düşmen-i dinün kanın su yerine.
Bora Gazi Giray. Kırım.
